Konstituciya – insan huqıqların támiyinlewshi tiykarǵı hújjet

Moynaq rayonı Mádeniyat orayında Qaraqalpaqstan Respublikası Konstituciyasınıń qabıl etilgenine 32 jıl tolıwı múnásibeti menen bayram ilajı shólkemlestirildi.

Ilajǵa Moynaq rayonı hákimi Baxtiyar Menglibekov, mákeme, kárxana basshıları hám rayon belsendileri qatnastı.

Dáslep Ózbekstan hám Qaraqalpaqstan Respublikalarınıń mámleketlik gimnleri jańladı.

Soń rayon hákimi Baxtiyar Menglibekov shıǵıp sóylep, Konstituciya insan mápin, onıń huqıqları menen erkinligin, ar-namısı hám qádir-qımbatın támiyinlewshi eń áhmietli huqıqıy hújjet ekenligin atap ótti.

Atap ótilgenindey, Qaraqalpaqstan Respublikası Konstituciyası 1993-jılı on ekinshi shaqırıq Qaraqalpaqstan Respublikası Joqarǵı Sovetiniń on ekinshi sessiyasında qabıl etilgen.

Konstituciya elimiz puqaralarınıń erk-ıqrarın ózinde sáwlelendiriwshi, insan huqıqları menen erkinliklerin támiyinlewshi, mámleketlik hákimiyatı uyımlarınıń jumısın tártipke salıwshı hám jumıs alıp barıw principlerin belgilewshi eń joqarı yuridikalıq kúshke ie bolǵan Bas nızam bolıp esaplanadı, dedi hákim B.Menglibekov. – Konstituciyanıń ayrıqsha áhmiyetke iye tárepi – onıń mazmun-mánisi hám huqıqıy kúshi tolıǵı menen huqıqıy mámleket hám puqaralıq jámiyetin qurıwǵa hám insan máplerine xızmet etiwge qaratılǵan.

Ilaj Moynaq rayonı Mádeniyat bólimi xızmetkerleri hám 2-sanlı Balalar muzıka hám kórkem óner mektebi jámááti tayarlawındaǵı koncert baǵdarlaması menen dawam etti.