2021-jıl 15-dekabr kúni saat 13:00 ler shamasında Moynaq rayonı “Bozataw” APJ turǵını Q.A tárepinen rayonlıq IIBne qońıraw kelip tústi. Ol óz sózinde, «Bozataw» APJ «Tallıq» awılına jaqın jerde, anıǵıraq etip aytqanda
Moynaq-Qońırat asfalt jolınıń kún batıs tárepinde biytanıs úsh puqara usı awılda jasawshı N.Sǵa tiyisli bolǵan maldı soyıp, terisinen shıǵarıp alıp ketpekshi bolıp atırǵanın kórgenligin, sol biytanıs shaxslar ?606? nomerli aq reńli “Neksiya 2” markalı avtomashinasına minip, rayon aymaǵındaǵı “Porlıtaw” awılı tárepke qaray qashıp ketkenligin bayan etken.

Usı xabarǵa tiykarlanıp, Moynaq rayonı IIB xızmetkerleri tárepinen operativ qıdırıw jumısları alıp barıldı. Nátiyjede ózgeniń mal-múlkin jasırın ráwishte urlap, talan-taraj etpekshi bolǵanlar Xorezm wálayatı Gurlen rayonı turǵını S.M ózleri jasaytuǵın aymaqtaǵı tanısları A.Z hám 95 R 606 SA bolǵan Neksiya 2 markalı avtomashinası basqarıwshısı T.Z lar ekenligi anıqlandı.

Olarǵa 2021-jıl 18-dekabr kúni Ózbekstan Respublikası JKniń 25, 169-statyası 2-bólimi “v” bánti menen jınayat isi qozǵatılıp, sol kúnniń ózinde irkiwge alındı. Házirgi kúnde bul is boyınsha Moynaq rayonı IIB janındaǵı tergew toparı tárepinen dáslepki tergew háreketleri alıp barılmaqta.

S.A.Xojanov, Moynaq rayonı IIB janındaǵı Tergew toparı tergewshisi, aǵa leytenant