Búgin Xalıq deputatları Moynaq rayonlıq Keńesiniń  79-sessiyası bolıp ótti

Ózbekstan Respublikası Prezidentiniń 2022 jıl 23-24 fevral kúnleri Qaraqalpaqstan Respublikasına saparı dawamında bergen tapsırmaları hám mámleket basshısı basshılıǵında 25 fevral kúni ótkerilgen 16-sanlı jıynalıs bayanına tiykar Tashkent wálayatı hákimligine Moynaq rayonın hár tárepleme sociallıq-ekonomikalıq rawajlandırıwǵa járdem beriw wazıypası júkletildi.

Tashkent wálayatı hákimligi tárepinen rayon xalqınıń turmıs sharayatın jaqsılaw hám párawanlıǵın asırıw, sociallıq qollap-quwatlaw maqsetinde wálayattıń jergilikli byudjetiniń qosımsha hám basqa derekler esabınan búgingi kúnge shekem kóplegen ilajlar alıp barılmaqta.

Búgin, 25-dekabr kúni Xalıq deputatları Moynaq rayonlıq Keńesiniń gezektegi jetpis toǵızınshı sessiyasında Tashkent wálayatı tárepinen Moynaq rayonında 2022-2023-jıllarda ámelge asırılǵan jumıslar nátiyjeliligi hám 2024ǵjılda ámelge asırılatuǵın ahmiyetli wazıypalar boyınsha esabatı tıńlandı.

Xalıq deputatları Moynaq rayonlıq Keńesiniń 79-sessiyasına zoom platforması arqalı Tashkent wálayatı hákimi Z.Mirzaev hám wálayattıń qala, rayon hákimleri, Xalıq deputatları Moynaq rayonlıq Keńesi deputatları, rayon belsendileri qatnastı. Sessiyanı Moynaq rayonı hákimi, Xalıq deputatları Moynaq rayonlıq Keńesi baslıǵı B.Menglibekov alıp bardı. Dáslep sessiya xatkerligine “Aeroport” saylaw okrugi deputatı A.Tlewov saylandı. Sonnan soń kún tártibine kiritilgen másele boyınsha Tashkent wálayatı hákiminiń orınbasarı A.Abdullaevtıń bayanatı tıńlandı.

A.Abdullaev sociallıq taraw ob’ektlerin qurıw, rekonstrukciyalaw hám tolıq ońlaw baǵdarı boyınsha alıp barılǵan jumıslarǵa toqtap ótti.

– Tashkent wálayatı hám Moynaq rayonı hákimlikleri birgelikte jámi 32, 0 mlrd. sum bahadaǵı 77 social taraw ob’ektlerin qurıw, ońlaw hám úskenelew jumısların ámelge asırıw boyınsha “Jol kartası”n islep shıǵıldı.  Búgingi kúnge shekem Tashkent wálayatı jergilikli byudjetinen bul ilajlar ushın 16,5 mlrd. sum aqsha ajıratıldı.  Atap aytqanda, ulıwma orta bilim beriw mektepleri boyınsha “Qazaqdár’ya” APJdaǵı 15-sanlı mektep kapital remontlandı (1, 5 mlrd. sum), “Úshsay” APJdaǵı 4-sanlı mekteptiń filialına jańa sport zalı qurıldı (1, 3 mlrd. sum), “Doslıq” MPJdaǵı  5-sanlı mekteptiń sport zal qurıw jumısları juwmaqlandı hám ushın 1, 1 mlrd. sum kólemdegi jumıslar ámelge asırıldı, “Bozataw” APJdaǵı Qarajar awılındaǵı 9-sanlı mektep filialı kapital remontlandı (337 mln. sum), hám rayondaǵı basqa mektepler 226 mln.sum bahadaǵı sport inven’tarları menen támiyinlendi – dedi ol.

Sonıń menen birge, Tashkent wálayatı tárepinen mektepke shekemgi bilimlendiriw mákemeleri boyınsha da bir qatar iygilikli isler ámelge asırıldı. Sonnan “Bozataw” APJdaǵı “Qıpshaqdárya” awılında 50 orınlı mektepke shekemgi bilimlendiriw shólkemi qurıldı hám  2,7 mlrd.sum kólemdegi jumıslar ámelge asırıldı, “Tik ózek” APJdaǵı 12-sanlı mektepke shekemgi bilimlendiriw shólkemi remontladı. (434 mln. sum). Den sawlıqtı saqlaw hám sociallıq qorǵaw máselelerine itibar qaratıldı. Atap aytqanda Moynqq rayonı medicina birlespesine tez járdem bólimi qurıw jumıslarınıń 80 procenti tamamlandı hám  850 mln. sum kólemdegi jumıslar ámelge asırıldı, sonday-aq medicina birlespesi 76,2 mln. sumlıq medicina úskeneleri menen tolıq támiyinlendi.

A.Abdullaev bayatında Tashkent wálayatı hákimligi tárepinen rayondaǵı kem támiyinlengen shańaraqlardıń 24 dana aǵzaları ushın medicinalıq operaciyalar ámelge asırılǵanlıǵı hám bul maqsetler ushın 85, 2 mln. sum pul qarjılandırılıp berilgenligin atap ótti.

– Rayon orayında hám “Hákim ata” APJda 984 mln. sum qarjı esabına kitapxana qurılıs jumısları juwmaǵına jetkezilip, kórkem ádebiy kitaplar menen támiyinlendi. “Qazaqdár’ya” APJ imaratı ońlandı hám 322 mln. sumlıq qurılıs jumısları ámelge asırıldı. Kúshli samal aqıbetinde tóbesi qulap túsken 2 kóp qabatlı turaq jay binalarınıń tóbesi 122, 6 mln. sum qarjı esabınan qayta remontlandı – A.Abdullaev bayanatın dawam ettirdi:

– Rayon daǵı barlıq mektepge shekemgi bilimlendiriw mákemelerine 56, 4 mln. sumlıq ishimlik suw wailtrleri ornatıldı. “Hákim ota” APJ Doslıq awılında, Bozataw APJ Qıpshaqdáryá hám Shaǵırlı awıllarında, Moynaq MPJ, Qazaqdár’ya APJ, Qızıljar APJ Aqbası awılında, Mádeli APJdaǵı 11-12 sanlı mekteplerde jámi bolıp 4,5 mlrd. sum esabına 8 sport maydanshaları qurıp pitkerildi. “Qazaqdár’ya” awıl puqaralar jıyınında 4, 5 km hám “Tik ózek” awıl puqaralar jıyınında 3 km. ishki jollar ońlandı hám 1, 1 mlrd. sum kólemdegi jumıslar ámelge asırıldı.

“Jasıl mákan” baǵdarlaması sheńberindegi 95 mln. sumlıq hárqıylı túrdegi terek nálleri egildi.

Sonıń menen birge, Tashkent wálayatı jergilikli byudjetiniń rezerv waondı qarjları esabınan Moynaq rayonındaǵı “Jaslar baǵı”na aymaqtıń ıqlımına sáykez shólge hám ıssıǵa shıdamlı dekorativ kórinisli náller jetkezip beriliwi hám  egiliwi menen baylanıslı qárejetler u 133, 4 mln. sum qárejetti quradı.

Moynaq rayonındaǵı awır turmıs sharayatında jasawshı shańaraqlarǵa tiyisli turaq jaylardı remontlaw, Moynaq rayonında ámelge asırılıp atırǵan investiciyalıq joybarlar boyınsha da nátiyjeli jumıslar ámelge asırıldı. Tashkent wálayatı hákiminiń orınbasarı A.Abdullaev óz bayanatında mine usı máselelerge de toqtap ótti.

Sonnan soń sessiya qatnasıwshılarınıń pikir, usınısları tıńlandı hám sózge shıqqanlar Moynaq rayonı xalqınıń jasaw sharayatın jaqsılaw baǵdarında alıp barılǵan  Tashkent wálayatınıń bul aǵalıq ǵamqorlıǵı ushın minnetdarshılıq bildirdi.

Deputatlar Ózbekstan Respublikası Ministrler Kabinetiniń 2023-jıl 2-fevral kúngi “Qaraqalpaqstan Respublikasında xalıq ushın múnásip turmıs sharayatın jaratıw hám máhálleler infrastrukturasın jáne de jaqsılaw is-ilajları haqqında”ǵı 52-sanlı qararı  boyınsha Moynaq rayonında belgilengen wazıypalar tolıq hám óz waqtında ámelge asırılıwın támiyinlew boyınsha sheshim qabılladı. Sonıń menen birge, Tashkent wálayatı hákimi Z.Mirzaev Moynaq rayonına aldaǵı waqıtta da járdem qolın sozatuǵınlıǵın hám A.Abdullaevqa 2024-jıl dawamında islenetuǵın jumıslar boyınsha sessiyada bildirilgen pikir, usınıslardan, úyreniw jumısların alıp barıw hám ózi tárepinen bergen kórsetpelerine muwapıq “jol karta”sın islep shıǵıw wazıypasın tapsırdı.